洋蔥炒豬柳

 

 

　　OL放工一定先要趕去街市買餸，然後才回家煮飯。但是，搭得車趕到街市，店舖都差不多關門，若想買件又靚又霖的豬肉去炒菜，真係難。

 

　　其實，超市或一些凍肉店都會出售急凍豬柳，只要假日時買定，放入冰格，預早在晚上醃好，這樣放工就唔駛趕去街市，回家即炒餸，話咁快就可以開飯。

 

　　今期教授的「洋蔥炒豬柳」，洋蔥平時買定幾個放在家，隨時可以用得著。

 

　　豬柳比一般瘦肉較霖，肥瘦適中，非常美味。

 

　　平日我較喜歡買一大條4至6磅的急凍巴西豬柳，回家解凍後切開4至5件，用來醃製叉燒，只要預早一晚醃好，放工回家放入焗爐，焗30分鐘，出爐搽蜜糖或蜜芽糖，方便又衛生。所以，只要大家花多一點心思，就可以將一樣食材來變化成多款菜式啦 ! 

 

 烹煮時間: 10 分鐘

 

份量: 2人

 

材料: 

 

 

　　豬柳 200克、洋蔥 1個

 

豬柳醃料: 

 

　　清水 1湯匙、生抽 1/2湯匙、砂糖 1/4茶匙、雞粉 1/4茶匙、粟粉 1/2茶匙、菜油 1茶匙

 

調味料:

 

　　生抽 1茶匙、老抽 1茶匙、蠔油 1茶匙、砂糖 1/2茶匙、幼鹽 1/4茶匙、粟粉 1/2茶匙、清水 4湯匙、麻油 1/2茶匙

 

做法:

 

 

　　1.  洋蔥去衣及沖洗，切絲備用。

 

　　2.  豬柳沖洗，切件，加入醃料，醃15分鐘。

 

　　3.  燒熱鑊，落1湯匙油，將洋蔥加入爆香及炒至軟身，加入豬柳炒至八成熟，最後加入調味料炒勻再煮2分鐘至豬肉熟透，即可上碟。

 

韋太小貼士:

 

　　豬柳可以預早一晚醃好放入雪櫃，待放工回家即炒，唔駛慢慢等豬肉醃入味。